endava-2

Македонските ИТ експерти од компанијата Ендава се горди на бројни успешни проекти преку соработката со повеќе од 70 клиенти од целиот свет. Британската компанија оваа година прославува повеќе од три години од отворањето на канцеларии во Скопје, а ќе продолжи и понатаму да придонесува во развојот на ИТ заедницата, стои во соопштението.

Ендава во Македонија започнува во јануари 2014 и една година подоцна компанијата се сели во сегашните канцеларии близу влезот на Старата чаршија во Скопје. Кога нашата земја била разгледувана како опција за Ендава, менаџерскиот тим внимавал на многу аспекти вклучувајќи ја стручноста на нашите ИТ кадри, бројот на дипломци, квалитетот на образовниот систем и отвореноста на државата кон привлекување на нов бизнис. Во моментов, тимот во Македонија брои над 180 вработени, а целта е да се достигне бројката од 400 како дел од долгорочниот план за развој.

“Ендава во 2015 се пресели во нашите сегашни канцеларии, каде имаме капацитет за 400 вработени. Особено горди сме на тоа што инвестираме во подобри услови за нашите вработени, но и во најнови технологии и платформи за работа со што одржуваме чекор со најновите трендови во ИТ индустријата. Искусни ИТ експерти и дипломирани студенти имаат можност за одлична кариера и постојан личен развој како дел од Ендава. Нашиот фокус кон долгорочен кариерен развој, работа во интернационална средина, директна соработка со клиенти и колеги во различни земји им овозможува на нашите вработени да стекнат и споделат знаење, но и можност да имаат клучен придонес во финалните решенија кои се доставуваат до нашите клиенти“, изјави Реми Саву, менаџер на Ендава во Македонија, истакнувајќи ја улогата на Ендава Скопје во групата и пошироко.

Компанијата нуди Програма за пракса, Програма за дипломирани студенти и Програма за професионална преквалификација, којашто е отворена со цел да се овозможи доедукација и пренасочување на сите заинтересирани кои сакаат да работат во ИТ секторот како тестери на продукти.

Ендава поседува интерна платформа за обука, сопствена библиотека и програма за кариерен план за секој од вработените, при што континуирано обезбедува внатрешни обуки за постојан развој на своите вработени и подобрување на нивните технички и интерперсонални вештини. Компанијата соработува со студентски парламенти и студентски организации, а има и повеќегодишна соработка со факултетите ФИНКИ и ФЕИТ во Скопје, Св. Апостол Павле во Охрид, ФИКТ во Битола и Универзитетот на Југоисточна Европа, со цел развој и придонес кон ИТ заедницата.

Во изминатите три години Ендава несебично инвестира и во проекти коишто имаат хуманитарен карактер, како IT4charity, каде локални бендови настапуваа пред околу 900 луѓе и беа собрани 8.000 евра за децата од СОС детското село во Скопје. Компанијата има придонесено и до детски домови и има спонзорирано претставник од домот за деца без родители 11 Октомври за учество на Интернационалната олимпијада по физика во 2016 во Цирих, како и група на студенти да отпатуваат на Mission on Mars Robot Challenge во Париз. Вработените во Eндава придонесоа и во креирање на технологија за деца со попречености преку соработка со организацијата Open the Windows каде беа изработени неколку едукативни апликации во форма на игри.

Компанијата во изминатите години придонесе со време, енергија и споделување на знаење во бројни натпревари, едукативни настани, обуки, работилници, Tech Flow конференции со реномирани експерти и говорници со цел создавање на нови технички подготвени кадри и успешни идни лидери.

Сето ова докажува дека Ендава, како на глобално ниво така и во канцеларијата во Македонија, ќе продолжи со инвестирање во својот раст и развој на заедницата во која припаѓа.

email