Во организација на Агенцијата за промоција и поддршка на туризмот оваа година Македонија ќе биде земја партнер на претстојниот саем за туризам во Измир, Турција Travel Turkey İzmir. Истиот ќе се одржи од шести до осми декември Агенцијата за туризам заедно со претставници од приватниот туристички сектор на Македонија ќе ги промовираат туристичките содржини и можности за зголемување на туристичкиот промет во државава.

Саемот за туризам во Измир, Турција Travel Turkey İzmir е еден од водечките туристички настани во Турција, којшто го соединува туристичкиот сектор на национално и меѓународно ниво секоја година. На последното издание на Travel Turkey İzmir со свој простор беа присутни 1.284 изложувачи од 36 земји, 54 градови и беше посетено од 44.589 туристички професионалци. Саемската манифестација секоја година има одлична медиумска покриеност со што на изложувачите им се овозможува зајакнување на  врските со странските пазари, во насока на постигнување на бизнис целите.

За поголема промоција на македонските туристички дестинации на турскиот туристички пазар, оваа година Агенцијата за туризам за прв пат спроведе маркетинг/медиумска кампања во Турција. Промоцијата на македонскиот туристички потенцијал и туристичките содржини беа промовирани на онлајн порталот www.gezimanya.com.

Во иста насока за поголема промоција, претставници на ТУРСАБ – Асоцијација на туристички агенции од Турција беа на информативнo патување кое беше во организација и соработка на Агенцијата за туризам и МНР. Истите имаа можност да го разгледаат градот и да ги искусат туристичките содржини на Скопје. Директорот на Агенцијата за туризам, Љупчо Јаневски и Игор Попов од Министерство за надворешни работи на средбите со претставници на ТУРСАБ – Асоцијација на туристички агенции од Турција и претседателот на асоцијацијата, Фируз Б. Баглика ја ги разгледаа можностите за продлабочување и зголемување на туристичката размена меѓу двете земји. Се разговараше и за официјализирање на заедничката дејност со потпишување на Меморандум за соработка со точно утврдени чекори за дејстување. Истите би биле насочени кон поголема промоција на Македонија како туристичка дестинација, отворање на чартер линии со цел зголемување на пакет аранжманите, а со тоа и раст на просечниот престој на турски туристи во земјава.

Турскиот туристички пазар е еден од најзначајните за нашата земја и според статистичките податоци најбројни се турските туристи во Македонија. Патуваат организирано, како и фамилијарни и роднински посети, а го посетуваат Охрид, Скопје, Битола, Дебар, Тетово, Гостивар. Најчесто патуваат за посета на роднини, одмор и екскурзии. Директните авионски линии, блискоста со македонскиот народ го зголемува интересот на турските туристи за посета на Република Македонија.

Важноста од присуство на Македонија и приватното стопанство на Travel Turkey İzmir се гледа од неколку аспекти, и тоа: развој на веќе постоечки деловни односи, воспоставување нови врски и партнерства, како и нови договори за соработка, создавање на свеста за исклучителен бренд и негово зајакнување, стартување и промоција на нови производи и услуги, размена на информации со домашни и меѓународни туристички експерти, можност за закажување на B2B состаноци со купувачи од странство, развој на задоволството на клиентите, како и воведување нови туристички трендови и дестинации за одмор.